وسى جىلدىڭ ناۋرىز-مامىر ايلارىندا جوبانىڭ 1-ءشى كەزەڭى اقتاۋ قالاسىنداعى №31 «ەركەماي», №53 بوبەكجاي جانە №54 «اينالايىن» بالاباقشالارىندا جۇرگىزىلدى. اتالعان جوبا ارقىلى ەلەكتر ەنەرگياسىن پايدالانۋ كولەمى 40 %-عا ازايدى. مىسالى, №31 «ەركەماي» بوبەكجايىندا جۇمسالاتىن ەلەكتر قۋاتىنىڭ كولەمى 4500 كۆت-تان 2130 كۆت-قا ازايسا, №54 «اينالايىن» بالاباقشاسىندا 6620 كۆت-تان 5100 كۆت-قا ازايدى. الداعى ۋاقىتتا وسى جوبانى 24 مەكتەپ پەن بالاباقشالاردا ەنگىزۋ جوسپارلانۋدا, دەپ حابارلايدى ماڭعىستاۋ وبلىسى اكىمىنىڭ ءباسپاسوز قىزمەتى.
- بارشاعا ءمالىم, 2015 جىلى قازاقستان رەسپۋبليكاسى ۇكىمەتى مەن حالىقارالىق قايتا قۇرۋ جانە دامۋ بانكى اراسىندا «قازاقستاندا ەنەرگيا تيىمدىلىگىن ارتتىرۋ» جوباسى بويىنشا گرانت تۋرالى كەلىسىمگە قول قويىلدى. گرانت قاراجاتى شۆەيتساريالىق دامۋ جانە ىنتىماقتاستىق اگەنتتىگىمەن دۇنيەجۇزىلىك بانك اكىمشىلىك جاسايتىن سەنىمگەرلىك قور ارقىلى بەرىلدى, - دەدى ەرالى توعجانوۆ.
جينالىستان كەيىن وبلىس اكىمى مەن شۆەيتساريالىق كونفەدەراتسيا وكىلدەرى №53 بوبەكجايدى ارالادى.
- اتالعان جوبانىڭ ارتىقشىلىقتارى قاتارىنا بىزگە جىلۋ رادياتورلارىنىڭ تولىعىمەن اۋىستىرىلۋى, جارىقديودتى ەنەرگيا ۇنەمدەۋىش شامدار مەن اۆتوماتتاندىرىلعان جىلۋ پۋنكتىنىڭ قوندىرىلۋى كىرەدى. ءبىز جاساعان تالداۋدىڭ ناتيجەلەرى ءبىزدى وتە قۋانتتى. مىسالى, وتكەن جىلدىڭ مامىر ايىندا ەلەكتر ەنەرگياسىنا 55 پەن 70 مىڭ ارالىعىندا تولەگەن بولساق, اعىمداعى جىلدىڭ مامىر ايىندا 35 مىڭ تەڭگە تولەدىك, - دەدى ساۋلە الىبەكوۆا, № 53 ساناتوريالىق-تۋبەركۋلەزدىك بوبەكجايدىڭ ديرەكتورى.
ايتا كەتەيىك, ەنەرگيا تيىمدىلىگىن ارتتىرۋ جوباسى قازاقستان بويىنشا ءبىرىنشى بولىپ ماڭعىستاۋ وبلىسىندا باستاۋ الدى, سونداي-اق الداعى ۋاقىتتا اتالعان جوبانى رەسپۋبليكامىزدىڭ وزگە دە وبلىستارىندا ەنگىزۋ جوسپارلانۋدا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
